ഒരു അധ്യാപക വിദ്യാർത്ഥിനി എന്ന നിലയിൽ സ്വയം വിലയിരുത്തുവാനും , സ്വന്തം കഴിവുകളെ തിരിച്ചറിയാനും , അവ മെച്ചപ്പെടുത്തുവാനുമുള്ള ഒരു അവസരമാണ് സ്കൂളിലെ അധ്യാപന പരിശീലനം. ബി എഡ് ന്റെ ഭാഗമായുള്ള അധ്യാപന പരിശീലന ഘട്ടത്തിന്റെ രണ്ടാം വാരം ആശങ്കകളൊന്നുമില്ലാതെ പൂർത്തിയാക്കുവാൻ സാധിച്ചു . നാല് പ്രവൃത്തി ദിനങ്ങളാണ് രണ്ടാം വാരത്തിലുണ്ടായിരുന്നത് . സ്കൂളിന്റെ പ്രവർത്തനങ്ങളും അതോടൊപ്പം കോളേജ് സംബന്ധമായ മറ്റു പ്രവർത്തനങ്ങളും ചെയ്യുവാൻ സാധിച്ചു. സ്കൂൾ പ്രവർത്തനങ്ങളിൽ സജീവമായി പങ്കെടുക്കുന്നതിലും അധ്യാപകരുടെ നിർദേശപ്രകാരമുള്ള ചുമതലകൾ നിറവേറ്റുന്നതിലും ശ്രദ്ധ പുലർത്തിയിരുന്നു .
ക്ലാസ്സിൽ അവതരിപ്പിക്കുവാനുള്ള പഠന ആശയങ്ങളെ മനസ്സിലാക്കുകയും അവ പഠിക്കുകയും അവതരണത്തിന് ആവശ്യമായ ആസൂത്രണവും മുന്നൊരുക്കങ്ങളും ചെയ്തിരുന്നു. സ്കൂളിലെ നാഷണൽ അച്ചീവ് മെൻറ് സർവ്വേയുടെ ടെസ്റ്റിന്റെ നടത്തിപ്പിന് ആവശ്യമായ പിന്തുണ അധ്യാപകർക്ക് നൽകുകയും പഠിതാക്കളുടെ മാർക്കുകൾ രേഖപ്പെടുത്തുവാൻ ഉള്ള സഹായം നൽകുകയും ചെയ്തിരുന്നു.
കായിക വിദ്യാഭ്യാസത്തിൻറെ ഭാഗമായ ആരോഗ്യം യോഗ എന്ന വിഷയങ്ങളിൽ ക്ലാസ്സെടുത്തിരുന്നു. ക്ലാസ് നിരീക്ഷിക്കുവാനായി ഞങ്ങളുടെ കായിക അധ്യാപകൻ ശ്രീ ഗോപാലകൃഷ്ണപിള്ള സ്കൂളിൽ വന്നിരുന്നു.
ഈ വാരത്തിൽ ഉടനീളം പലതവണയായി വൈദ്യുതി മുടങ്ങിയതിനാൽ സാങ്കേതികവിദ്യ ഉപയോഗപ്പെടുത്തി ക്ലാസ് എടുക്കുന്നതിൽ ബുദ്ധിമുട്ട് അനുഭവപ്പെട്ടിരുന്നു.
പ്രതിഫലനം
സാമൂഹ്യശാസ്ത്രത്തിന് പുറമേ മറ്റു വ്യത്യസ്ത വിഷയങ്ങളിൽ ക്ലാസ്സെടുക്കുവാൻ സാധിച്ചത് ഒരു പുതിയ അനുഭവമായിരുന്നു. ആരോഗ്യം, യോഗ ,ലഹരി വസ്തുക്കളുടെ ദുരുപയോഗത്തെ പറ്റിയുള്ള ബോധവൽക്കരണ ക്ലാസ് എന്നിവയിലെല്ലാം തന്നെ പഠിതാക്കൾ ഊർജ്ജസ്വലരായി പങ്കെടുത്തിരുന്നു. ഇത്തരം പാഠ്യപാഠ്യേതര പ്രവർത്തനങ്ങളിലൂടെ പഠിതാക്കളിൽ വ്യക്തി- സാമൂഹിക കഴിവുകളെ പ്രോത്സാഹിപ്പിക്കുവാനും അവരെ നല്ല പൗരന്മാരായി വാർത്തെടുക്കുവാനും സാധിക്കും എന്ന് തിരിച്ചറിവുണ്ടായി.
